Kæri Viskufélagi, ég heiti Freyr Snorrason. Ég er 28 ára gamall, alinn upp í Kópavogi en búsettur á Hlíðarenda í Reykjavík með unnustu minni og tveggja ára syni okkar.
Með framboði mínu í stjórn Visku vil ég leggja áherslu á ungt fólk og að styrkja stöðu háskólamenntuðu millistéttarinnar.
Ég er með meistaragráðu í borgarfræðum frá frjálsu háskólunum í Brussel (ULB og VUB), í grunninn er ég með BA gráðu í sagnfræði frá Háskóla Íslands.
Í dag starfa ég við bæjarskipulagsmál sem verkefnastjóri á skipulagsdeild Kópavogsbæjar.
ÁHERSLUR
Það er mikilvægt að hugsa stórt og til þess þarf að vera stór og fjölga félagsmönnum.
Viska þarf að styrkjast til að verða raunverulegt afl í lífskjarabaráttu venjulegs fólks.
Þannig verður Viska:
- Burðarás í heildarstefnumótun kjaramála og veigamikið afl gagnvart atvinnurekendum.
- Stefnumótandi í hagsmunagæslu fyrir hina háskólamenntuðu millistétt sem fer ört stækkandi. Með aukinn slagkraft í daglegri umræðu og sterkari hagsmunagæslu.
- Leiðandi og umbótasinnað félag í lífskjara-, húsnæðis- og velferðarmálum Íslands á 21. öldinni.
Viska hefur greint frá því að kaupmáttur ungs fólks (30-39 ára) hefur staðið í stað í 20 ár, þar af 25 ár hjá karlmönnum.
Í samanburði við Norðurlöndin er kynslóðaójöfnuður á Íslandi að aukast mun hraðar.
Þessi þróun hófst eftir hrunið 2008, en hagvöxtur síðan þá hefur aðallega stafað af innflutningi fólks og vexti í láglaunastörfum á meðan hefur fólki fjölgað í háskólanámi.
Það verður að móta nýja atvinnustefnu til að mæta þessari þróun og koma til móts við ungt fólk.
Þar getur Viska:
- Gert stöðnun kaupmáttar ungs fólks að forgangsmáli í kjarabaráttu. Menntun á að skila sér strax í heimilisbókhaldið.
- Unnið að kerfislausnum í námslánakerfinu þannig að óstöðugu vaxta- og verðbólgustigi krónunnar sé ekki velt yfir á unga greiðendur.
Vinna þarf að betri lausnum fyrir greiðendur í eldra námslánakerfi eins og greiðsluþak og bjóða yfirfærslu námslána í nýja kerfið.
- Krafist þess að stjórnvöld móti atvinnustefnu sem tryggir að millistéttin drífi áfram hagvöxt og háskólamenntun sé metin til launa.
Viska er með aðgang að sjóðum BHM en félagsmenn upplifa sjóðina óaðgengilega og missir því af tækifærum til að nýta sér þá.
Sterkt sjóða- og styrkjakerfi er hvatakerfi.
Viska skal:
- Auka sýnileika sjóða svo þeir nýtist félagsfólki sem kjarabætur.
- Samhliða stækkun félagsins stofna eigin sjóði sem bæta lífskjör félagsmanna.
Félagið gæti veitt tímabundna styrki fyrstu tvö ár afborgana á námslánum, stofnað nýsköpunarsjóð Visku og veitt styrki til hugmyndaþróunar á frumstigi.
Í þágu samfélagsins og stærra félags á almennum markaði.